Цената на нафтата повторно се искачи над 100 долари за барел, откако војната на Блискиот Исток и нападите врз танкери го нарушија транспортот низ Ормуски Теснец – една од најважните енергетски артерии во светот.
Според анализите на енергетските пазари, цената на суровата нафта Brent накратко достигна околу 119 долари, што е највисоко ниво во последните години.
Преку Ормускиот теснец поминува околу 20% од светската трговија со нафта, па секое нарушување во оваа зона веднаш создава страв од глобален недостиг на енергенси.
Поради нападите врз танкери и ризикот од блокада, испораките се значително намалени, што ги турка цените нагоре и создава притисок врз светската економија и инфлацијата.
Може ли цената да го надмине рекордот од 2008?
Историски, највисоката цена на нафтата е забележана во јули 2008 година, кога барел достигна 147,27 долари.
Сепак, некои банки и аналитичари предупредуваат дека ако конфликтот продолжи и транспортот низ Ормускиот теснец остане ограничен, цената би можела да достигне 140–150 долари за барел, што би било дури и над рекордот од 2008 година.
За да се намали ценовниот шок, Меѓународната агенција за енергија најави ослободување на рекордни 400 милиони барели нафта од стратегиските резерви на 32 земји.
Експертите предупредуваат дека ако кризата потрае, светот би можел да се соочи со нов енергетски шок, раст на инфлацијата и ризик од глобална рецесија.