Грција ќе престане да биде најзадолжена земја во еврозоната до крајот на оваа година, бидејќи нејзиниот јавен долг ќе падне под оној на Италија , објави Ројтерс. Се очекува грчкиот долг да се намали на околу 137% од бруто домашниот производ, во споредба со 145,9% во 2025 година.

Спротивно на тоа, Италија очекува нејзиниот долг да достигне врв од 138,6% во 2026 година, што е за 1,5 процентни поени повисоко отколку во 2025 година, според повеќегодишниот буџетски план на Министерството за финансии објавен оваа недела.

Грција ќе престане да биде најзадолжената земја во еврозоната оваа година , изјавија два извори за Ројтерс, додавајќи дека новата проценка на коефициентот на долг на Грција ќе биде вклучена во повеќегодишниот фискален план на земјата што ќе биде презентиран пред Европската комисија подоцна овој месец.

Долгот на Италија ќе биде приближно стабилен на 138,5% во 2027 година, пред да падне на 137,9% во 2028 година и 136,3% следната година, покажува нејзиниот буџетски план. Јавниот долг на Грција, највисок во еврозоната во последните две децении, се намали за повеќе од 60 процентни поени на 145,9% од бруто домашниот производ минатата година од врвот од 209,4% во 2020 година. Италија го намали својот долг за околу 17% во истиот период.

Грција, која се опоравува од децениска финансиска криза и три спасувачки пакети во вкупен износ од околу 280 милијарди евра, планира да ги отплати кредитите во вредност од околу 7 милијарди евра од првата спасувачка програма подоцна оваа година.

Италијанската премиерка Џорџија Мелони вели дека долгот на Италија ќе се намалувал побрзо да не било негативното влијание на државните стимулации за градежништво, воведени од нејзините претходници Џузепе Конте и Марио Драги. Откако силно се опорави од пандемијата COVID-19, Италија се врати на своето вообичаено место меѓу земјите со најбавен раст во еврозоната.

Земјата пријави три последователни години раст под 1% од 2023 до 2025 година , и покрај постојаниот прилив на милијарди евра од фондовите на ЕУ за постпандемиско закрепнување, тренд што буџетскиот план на Министерството за финансии предвидува да продолжи до 2029 година.

Грчката економија постојано расте за над 2% во последните три години, надминувајќи го просекот на ЕУ, благодарение на инвестициите, домашната побарувачка и туризмот.