Акционерите на италијанската „УниКредит“ во понеделник одобрија зголемување на капиталот што ѝ овозможува на италијанската банка да поднесе непријателска понуда од 35 милијарди евра (41 милијарда долари) за својот германски конкурент „Комерцбанк“.
Акционерите на „УниКредит“ го одобрија предлогот за издавање дополнителни акции со цел зголемување на акционерскиот капитал за 6,7 милијарди евра на вонредна седница, објави банката.
Денеска, „УниКредит“ планира официјално да ја објави својата понуда до акционерите на „Комерцбанк“ од 0,485 акции на „УниКредит“ по акција на „Комерцбанк“.
Врз основа на цените на акциите на банките во понеделник, таа понуда претставува загуба од околу три евра по акција за акционерите на „Комерцбанк“.
Втората по големина италијанска банка е веќе водечки акционер на „Комерцбанк“ со 25 проценти удел.
Според правилата на германскиот пазар, ако го зголеми својот удел над 30 проценти, мора да им даде понуда на другите акционери да ги стекнат нивните акции.
„УниКредит“ ги привлече акционерите на „Комерцбанк“ со ветувања за повисоки приноси со пренасочување на своите активности на германскиот пазар за да поттикне побрз раст.
Сепак, „Комерцбанк“ изјави дека нејзината стратегија им нуди на акционерите подобри изгледи и ќе обезбеди ажурирана траекторија на раст до 2030 година кога ќе ги објави резултатите од првиот квартал во петок.
„Нашето мислење останува непроменето“ за вредноста на понудата на „УниКредит“, изјави портпарол на „Комерцбанк“ за АФП.
Германската влада, исто така, постојано го изразува своето противење на преземањето на „Комерцбанк“.