Просечната месечна исплатена нето-плата по вработен во мај 2026 година изнесува 49.544 денари, покажуваат најновите податоци од Државниот завод за статистика. Во споредба со истиот месец минатата година, просечната нето-плата е зголемена за 8,2 отсто, додека во однос на април 2026 година е повисока за 1,6 отсто. Најголем придонес во годишниот раст на платите има зголемувањето на просечната исплатена нето-плата во неколку сектори.
Најзначително зголемување е забележано кај секторот „Снабдување со вода; отстранување на отпадни води, управување со отпад и дејности за санација на околината“, каде платите пораснале за 11,9 отсто.
Следуваат секторите „Уметност, забава и рекреација“ со раст од 11,3 отсто и „Транспорт и складирање“ со зголемување од 10,9 отсто.
Во однос на претходниот месец, најголем раст на просечната нето-плата е регистриран во секторите „Трговија на големо и трговија на мало; поправка на моторни возила и мотоцикли“ со раст од 6,3 отсто, „Рударство и вадење камен“ со 5,8 отсто и „Транспорт и складирање“ со 5,7 отсто. Според статистичките податоци, реалната нето-плата во мај 2026 година е повисока за 5,3 отсто во споредба со мај 2025 година, што укажува на раст на куповната моќ на вработените.