Српската индустрија за видеоигри регистрираше пораст на приходите од 22 отсто во 2024 година, со проектиран вкупен приход од 214 милиони евра, според годишниот извештај на Српската асоцијација за индустрија за видеоигри.
Минатата година, бројот на вработени во оваа индустрија исто така се зголеми – од 3.419 во 2023 година на 3.596 во 2024 година. Покрај зголемувањето на бројот на вработени, во 2024 година е забележано и зголемување на бројот на произведени игри.
Така, во споредба со 2023 година, бројот на произведени видеоигри се зголеми за 14, односно од 30 на 44 игри. Од 44 објавени игри, 17 се „Core Games“, т.е. оние направени за конзоли, додека 27 се за мобилни телефони. Од компаниите што се занимаваат со гејминг, 49 отсто имаат свои канцеларии надвор од Србија, главно во САД и Ирска.
Најголем број канцеларии каде што се произведуваат игри се наоѓаат во Белград (39) и Нови Сад (13), додека четири има во Ниш, две во Крагуевац и по една во Црвенка, Панчево, Вршац и Шабац. Во Србија, 55 отсто од компаниите развиваат свои оригинални производи.
Извештајот објавен од Српската асоцијација за индустрија за видеоигри покажува дека игрите произведени во Србија (иако некои се создадени на друго место) биле купени или преземени речиси 300 милиони пати.
Истражувањето, исто така, покажува дека дури 78 отсто од студијата за игри користат вештачка интелигенција во своето работење, како и дека професионалец за игри работи во истата компанија во просек речиси пет години. Во 2024 година, првите 10 српски компании во таа индустрија заработиле вкупно 19 милиони евра, а приходот по вработен изнесувал 66.000 евра.