Екстремните временски услови ова лето предизвикаа штета од 43 милијарди евра во Европската Унија. Земјите најпогодени од топлина, суша и поплави беа Кипар, Грција, Малта и Бугарија, се наведува во студијата на Универзитетот во Манхајм.
Економистите од Универзитетот во Манхајм и Европската централна банка ги опишаа резултатите како „конзервативни“ бидејќи не ги зедоа предвид рекордните шумски пожари што ја зафатија јужна Европа во август, ниту пак зголеменото влијание на екстремните временски настани што се случуваат во исто време, објавува денес „Гардијан“.
Водечкиот автор на студијата, економистот Сериш Усман, рече дека „вистинските трошоци од екстремните временски услови полека излегуваат на површина бидејќи овие настани влијаат на животите и средствата за живот преку широк спектар на канали“.
Кипар, Грција, Малта и Бугарија регистрираа штета од екстремни временски настани што изнесува околу 1% од нивниот бруто домашен производ (БДП) во 2024 година, а слична штета е регистрирана и од други медитерански земји, вклучувајќи ги Шпанија, Италија и Португалија.
Се очекува дека трошоците за штета предизвикана од екстремни временски настани за Европската Унија ќе се зголемат на 126 милијарди евра до 2029 година.