Рускиот нафтен гигант „Лукоил“, кој минатата недела беше погоден од нов пакет санкции од САД, официјално објави дека ги става сите свои странски средства на продажба. Во соопштението до јавноста, компанијата потврди дека, во врска со воведувањето на рестриктивните мерки, веќе почнува да разгледува понуди од потенцијални купувачи.
Ваквиот потег директно ќе влијае на сопственичката структура на мрежата бензински пумпи на „Лукоил“ во Македонија, како и во целиот регион.
Истовремено со воведувањето на санкциите против „Лукоил“, Министерството за финансии на САД издаде и општа лиценца. Со оваа лиценца се дозволуваат трансакции кои се неопходни за прекинување на работењето со компанијата, со краен рок до 21 ноември.
Компанијата во своето соопштение појасни дека процесот на продажба се одвива токму според оваа општа лиценца. „Лукоил“ исто така нагласи дека ќе се обиде да ја продолжи важноста на лиценцата, доколку е потребно, со единствена цел да обезбеди континуирано работење на своите странски поделби додека не се заврши продажбата.
„Лукоил“ во моментов поседува производствени проекти во дванаесет земји и сè уште игра значајна улога на европскиот енергетски пазар. Во европски средства на нафтениот гигант вклучени се клучни рафинерии за нафта, меѓу кои и единствената рафинерија во Бугарија, како и големи складишта и мрежи на бензински пумпи во Романија, Бугарија, Хрватска, Србија, Црна Гора и Македонија.
Во Македонија, „Лукоил“ има околу 40 бензински пумпи и неколку стотици вработени.