Биткоин падна на најниското ниво во последните шест месеци, откако инвеститорите почнаа да ја намалуваат изложеноста кон ризични средства поради неизвесноста околу следните потези на американската централна банка.

Најпознатата светска криптовалута се спушти на 86.325,81 долари, што е најниска вредност од 21 април. Подоцна цената се стабилизираше околу 86.690 долари.

XRP падна за 2,3%, а ether изгуби повеќе од 3% од својата вредност и се тргува далеку под нивото од 3.000 долари.

Истовремено пад забележаа и главните индекси на Wall Street, откако почетниот ентузијазам предизвикан од импресивните резултати на технолошкиот гигант Nvidia брзо се намали.

Песимизам го зазема пазарот

Веројатноста биткоин да ја заврши годината под 90.000 долари порасна на 50%, според податоците на платформата за опции Derive.xyz, бидејќи трговците сè повеќе се осигуруваат од нови падови, пренесува Reuters.

Од почетокот на октомври, кога достигна рекордни 126.223,18 долари, биткоин е во континуиран пад. Од почетокот на годината изгуби повеќе од 7% од вредноста и се движи кон својот прв годишен пад од 2022 година.

Што го предизвикува падот?

Една од клучните причини за падот е поконзервативниот став на неколку функционери на американскиот Федерален резервен систем, кои предупредуваат дека инфлацијата во САД сè уште е висока и советуваат претпазливост при идните намалувања на каматните стапки. Ова ги намали очекувањата на пазарите и создаде дополнителен притисок врз биткоин и другите ризични средства, вклучително и акциите.

„Цената на BTC моментално е многу нестабилна и се движи надолу“, изјави Шон Доусон, директор на истражување во Derive.xyz. „Претходните двигатели на раст – како пониските каматни стапки – се исцрпени, што го запре нагорниот импулс. Со други зборови, многу малку има на хоризонтот што може да внесе оптимизам.“

Пад и на Wall Street

Главните берзански индекси во САД исто така паднаа. Иако Nvidia објави прогноза за продажба многу подобра од очекувањата и ги надмина приходите во третиот квартал, акцијата по почетниот скок од 5% на крајот падна за 1%. Овој пресврт го повлече надолу и целиот технолошки сектор.

„Моментално ситуацијата е под контрола, но што ќе се случи за три месеци, кога пазарот со нетрпение ќе го очекува следниот квартален извештај на Nvidia? Иако добивката и готовинскиот тек на компанијата се силни како на ултрамаратонец, има одредени црвени знамиња што треба да се имаат предвид“, предупреди Ден Коутсворт од AJ Bell.

Извршниот директор на Nvidia, Џенсен Хуанг, ги отфрли стравувањата за создавање AI-балон: „Ние гледаме нешто сосема поинакво.“

Големите технолошки компании преовладуваат во црвено

Поголемиот дел од големите технолошки компании беа во минус, меѓу нив и Amazon.com со пад од 0,8%. Индексот на информатичка технологија по првичниот раст се намали за 1%, додека акциите од секторот за основни потрошувачки производи беа меѓу ретките добитници.

Дополнителна нервоза на пазарот внесоа податоците за септември кои покажаа забрзување на растот на вработеноста во САД, но и зголемување на стапката на невработеност на 4,4%, што укажува на забавување на пазарот на трудот.