Иако во Собранието се туркаат законски измени за намалување на коефициентите за пресметка на платите на функционерите, тоа не значи автоматски и пониски примања. Напротив, поради растот на просечната плата и додатоците како минат труд, дел од функционерите и понатаму ќе земаат исти или дури повисоки плати. МИА објави дека пакетот закони се носи по скратена постапка и дека, според предлагачот Бојан Стојаноски, целта е платите да се „нивелираат“ и да се намалат за околу 10 до 13 илјади денари.
Но, клучниот проблем е што основата за пресметка расте. Просечната плата за 2025 година е значително повисока, па и со понизок коефициент, конечните суми остануваат високи. Така, кај највисоките државни функции, како премиерот, претседателката и претседателот на Собранието, на основната пресметка дополнително се додава процент за стаж, што ја крева конечната нето-плата уште повеќе.
Слична е состојбата и кај министрите, пратениците, обвинителите, судиите и другите избрани и именувани лица. Иако на хартија се зборува за намалување, реалната слика покажува дека растечката просечна плата и другите законски додатоци практично го јадат ефектот од тоа кратење. Дополнително, кај дел од функциите постојат и други надоместоци, што уште повеќе го зголемува вкупниот месечен износ.
Со овие измени се најавува и намалување на коефициентите за градоначалниците, но останува дилемата дали јавноста навистина ќе почувствува дека функционерските примања се кратат, ако крајниот резултат повторно покажува високи или зголемени суми.