Сегашниот финансиски пулс на земјата го покажува стабилното здравје на банкарскиот сектор, кој и понатаму расте и во депозити и во кредити, иако на краток рок се забележуваат ситни осцилации. Во февруари, вкупните депозити достигнаа 10,64 милијарди евра, што претставува годишен скок од речиси 10%, но во однос на јануари бележиме благо намалување од 0,1%, пред се поради повлекување на средства од корпоративниот сектор. Кредитната активност, пак, се движи побрзо: вкупните кредити се искачија на 9,15 милијарди евра, со годишен раст од 12,6% и скромен месечен пораст од 0,2%.
Домашните штедачи и должници се активен двигател на банкарскиот систем. Депозитите на домаќинствата во февруари изнесуваа 7,26 милијарди евра, со месечен раст од 0,8% и годишен од 11,4%. Очигледно, граѓаните сè повеќе ја доверуваат својата заштеда во денари и на подолг рок, што укажува на зголемена доверба во домашната валута и стабилноста на финансискиот систем.
Но, штедењето оди рака под рака со задолжувањето. Кредитите на домаќинствата достигнаа 4,55 милијарди евра, со месечен раст од 0,7% и годишен од 11,3%. Најголемиот дел се потрошувачки кредити (2,33 милијарди евра) и станбени кредити (1,81 милијарда евра). Посебно се издвојуваат станбените кредити, кои бележат солиден годишен раст од 16,1%, што го одразува оживувањето на пазарот на недвижности. Потрошувачките кредити, пак, растат побавно – 10,6% на годишно ниво. Побарувачката за кредити за возила исто така се зголемува, со месечен пораст од 1,5%, што може да се толкува како сигнал за постепено закрепнување на потрошувачката.
Забележлив е и падот на краткорочните и поскапи задолжувања. Кредитните картички бележат месечен пад од 1,6% и годишен од 5,1%, а минусите на тековните сметки се намалени за 0,8% месечно. Ова покажува дека граѓаните се повеќе се ориентираат кон поповолни кредитни продукти и поголема финансиска дисциплина.