Британската министерка за финансии, Речејл Ривз, го претстави новиот преглед на државното трошење, во кој предвидува големи јавни инвестиции во здравство, одбрана и инфраструктура. Планот тежи речиси 3 трилиони долари и треба да се реализира до крајот на оваа деценија.
Бројките се амбициозни: 2,8% повеќе за здравствениот сектор, зголемување на воените трошоци до 2,6% од БДП до 2027 година, и 39 милијарди фунти за социјално домување до 2029. Дневните јавни трошоци ќе растат за 1,2% годишно, а капиталните за 1,3%.
Но, ваквата стратегија не доаѓа без ризици. Буџетот се потпира на најголемиот даночен прилив од 1993 наваму – пред сè преку зголемување на придонесите од национално осигурување. Претходно најавените фискални правила се ревидираат за да се овозможи поголема флексибилност во задолжувањето, но финансиските пазари остануваат на штрек.
Пазарите на обврзници и аналитичарите веќе сигнализираат сомнеж. Со слаб раст во април и притисок врз продуктивноста, Британија оди по тенка линија помеѓу инвестиции и ново задолжување. Гувернерот на Банката на Англија, Ендру Бејли, предупреди дека вакви фискални експерименти треба да се водат со особено внимание, особено во време кога глобалните трошоци за климатски промени, стареење на популацијата и геополитички ризици растат.
Наредниот голем тест за владата ќе биде есенскиот буџет. Прашањето е: дали „трошењето сега – даноци подоцна“ ќе успее без дополнителни шокови за граѓаните и пазарите?