Водечките британски банки започнаа иницијатива за воспоставување локален платен систем како алтернатива на американските мрежи „Visa“ и „Mastercard“, поради зголемените геополитички ризици и стравувањата од потенцијални ограничувања на услугите.
Според „Гардијан“, раководителите на најголемите банки го одржале првиот состанок за проектот наречен „DeliveryCo“, чија цел е да се намали зависноста од странски платни инфраструктури и да се зајакне финансиската отпорност на земјата. Проектот го води извршниот директор на „Barclays UK“, Вим Мар, а во него учествуваат претставници на „Santander UK“, „NatWest“, „Lloyds Banking Group“, „Nationwide“, „Coventry Building Society“ и банкоматската мрежа „Link“.
Во моментов, околу 95% од сите картични трансакции во Велика Британија се процесираат преку „Visa“ и „Mastercard“, што претставува значителен системски ризик во услови на намалена употреба на готовина. Аналитичарите предупредуваат дека евентуален прекин на овие услуги би имал сериозни последици врз економијата, слични на оние што ги почувствува Русија по воведувањето на санкциите.
Планот предвидува развој на целосна платна инфраструктура, правна рамка, модел на управување и финансирање, со цел системот да биде оперативен до 2030 година. Заменик-гувернерката на Банката на Англија, Сара Бриден, истакна дека новата платформа може да служи како резервна опција во случај на прекин на постојните системи, зголемувајќи ја стабилноста на финансискиот сектор.
„Visa“ и „Mastercard“ ја поздравија иницијативата, нагласувајќи дека остануваат посветени на иновациите, безбедноста и сигурноста на платните услуги во Велика Британија.