Швајцарската инвестициона банка UBS испрати силно предупредување до глобалните пазари – цената на бакарот влегува во фаза на остар и континуиран раст, објави Ројтерс. Според нив, комбинацијата од чести прекини во производството во рудниците, одложени експанзии и сè поголема побарувачка поттикната од електрификацијата и енергетската транзиција, ќе ја турка цената на овој метал кон историски рекорди.
UBS ја зголеми целната цена за бакар за март 2026 година за 750 долари, поставувајќи ја на 11.500 долари по тон. Проекциите за јуни и септември исто така се ревидирани нагоре за по 1.000 долари, на 12.000, односно 12.500 долари по тон. Банката очекува пазарот постепено да влезе во дефицит, бидејќи испораките, особено од Латинска Америка, се послаби од очекуваното, а новите производствени капацитети доцнат.
Круна на прогнозата е дека до декември 2026 година бакарот би можел да достигне 13.000 долари по тон – едно од највисоките очекувања меѓу водечките финансиски институции. UBS проценува дека бакарот станува клучен стратешки метал за енергетската транзиција, што дополнително ќе го зголемува неговото значење и ценовен раст во наредните години.