Општинската организација на СДСМ во Кавадарци денеска остро реагираше на најновите информации дека главната печка за производство на фероникел во комбинатот ФЕНИ е целосно изгасната – сигнал, според нив, дека рестартирањето на фабриката не е ни на повидок.
Советникот и претседател на ОО СДСМ Кавадарци, Вуко Мелов, предупреди дека ваквата состојба ќе има долгорочни последици врз локалната економија.
„Гаснењето на печката значи дека секој можен рестарт ќе бара месеци реконструкција. Тоа е удар за градот и за сите што зависат од овој комбинат“, изјави Мелов.
Од партијата велат дека властите ги изневериле граѓаните и работниците, и дека ветувањата на премиерот Христијан Мицкоски и градоначалникот Митко Јанчев за „брз рестарт“ се покажале како нереални.
„Работниците се оставени сами на себе. Ветуваа исплата на сите заостанати плати, исплата на доверителите, враќање на луѓето на работа – денес од тоа нема ништо“, порача Мелов.
СДСМ додава дека дел од работниците се со месеци без примања, додека доверителите и транспортерите сè уште чекаат на исплати.
Според опозициската партија, ФЕНИ – некогаш столб на тиквешката индустрија – денес е симбол на, како што велат, „неспособноста и лажните ветувања на власта“, а локалната заедница останува да ја плаќа цената на застојот.