Поштенскиот сообраќај во Соединетите Американски Држави е намален за повеќе од 80 проценти, додека 88 земји целосно или делумно ги прекинаа поштенските услуги кон САД, објави Светскиот поштенски сојуз.
Овој пад на сообраќајот следеше откако Вашингтон воведе нови тарифи, односно го укина ослободувањето од царински давачки за мали пратки, пишува SEEbiz.
Светскиот поштенски сојуз, специјализирана организација на Обединетите нации со седиште во Берн, има речиси 200 членови. Таа поставува правила за меѓународна размена на пошта, обезбедува техничка помош и работи на подобрување на поштенските услуги.
Сојузот во моментов развива технички решенија за поштенските пратки повторно да можат непречено да пристигнат во САД, изјави за АФП нејзиниот генерален директор Масахико Метоки.
На крајот на август, администрацијата на американскиот претседател Доналд Трамп го откажа ослободувањето од царински давачки за мали пратки што пристигнуваат во САД.
Поради неизвесноста во врска со оваа мерка, неколку поштенски администрации низ целиот свет – вклучувајќи ја и Хрватската пошта – одлучија привремено да ги прекинат одредени поштенски пратки кон Соединетите Американски Држави.
Слични мерки беа преземени од поштите во Австрија, Австралија, Белгија, Данска, Франција, Германија, Индија и Нов Зеланд.