Рафинеријата во Панчево го запре производството, а постројките влегоа во таканаречена топла циркулација – термин што означува кога одредена количина суровини циркулира низ системот за да се одржи системот функционален.
Според српски медиуми, Нафтена индустрија на Србија (НИС) практично остана без нафта за преработка, и не смее да преработува домашна нафта без да ја комбинира со соодветна увезена нафта, за да не ја оштети рафинеријата, која е наменета за одреден вид нафта – првично за руска нафта.
Почнувајќи од денеска, НИС ќе започне со ремонт на рафинеријата, што треба да трае до 15 декември. Причината за затворање на рафинеријата, сепак, не е ремонтот, наведуваат српските медиуми. Претседателот Александар Вучиќ неодамна го призна тоа на јавна седница на Владата на Србија, нагласувајќи дека нема да учествува во „лажењето на народот дека нашата Рафинерија се затвора заради реновирање“.
Претседателот на Србија, Александар Вучиќ, најави дека денеска во 11:00 часот ќе се обрати до јавноста, кога треба да објави решение за ситуацијата во која се најде НИС.