Медиумскиот гигант RTL Германија ќе редуцира околу 600 работни позиции како дел од програмата за преструктуирање, поради сложените финансиски околности, истакна денес за ДПА главниот извршен директор на РТЛ Германија, Стефан Шмитер.
“Постојат два главни предизвици што треба да ги решиме за да бидеме успешни на долг рок”, рече Шмитер.
Еден од овие предизвици е радикална трансформација на медиумскиот пазар, а другиот е комплицираната економска состојба, додаде тој.
Германскиот неделен магазин за бизнис “Виртшафтсвохе” претходно извести за значително намалување на бројот на работници во компанијата, која е дел од медиумскиот конгломерат “Бертелсман”.
Според РТЛ Германија, 600-те засегнати места ги опфаќаат и работните позиции со полно и со скратено работно време. Преструктуирањето има за цел да се реализира на општествено одговорен начин.
“Што е можно поопштествено одговорно, почитувачко и потранспарентно во толку тешка ситуација”, додаде Шмитер.
Во соработка со синдикатите, беше изготвена специфична програма за надоместоци со цел да се помогне на вработените кои се погодени.
“Социјалниот план што го преговаравме со работничкиот совет има за цел да ги избегне отпуштањата колку што е можно повеќе”, изјави Шмитер.
Наместо тоа, вработените кои се засегнати ќе бидат ослободени преку етапно пензионирање, надоместоци и други бенефиции.