Во 2026 година, Владата на Србија планира да се задолжи околу 970 милијарди динари (8,3 милијарди евра) со цел да го покрие буџетскиот дефицит и да ги отплати старите долгови, објави порталот Nedeljnik.rs.

Според предлогот за буџетот за следната година, расходите на државната каса ќе изнесуваат 2.751,7 милијарди динари (23,5 милијарди евра), додека приходите се очекува да изнесуваат 2.414,7 милијарди динари (20,6 милијарди евра), што создава дефицит од 337 милијарди динари (2,88 милијарди евра).
Значителен дел од новите долгови нема да бидат насочени кон нови проекти, туку кон враќање на претходно земени кредити и обврзници. Во 2026 година, ќе треба да се платат дури 793 милијарди динари (околу 6,77 милијарди евра) од главницата на старите долгови.

Меѓу најголемите доспеани обврски, се издвојуваат два големи заеми за буџетска поддршка земени од Владата и Фондот за развој на Абу Даби (Обединети Арапски Емирати), кои целосно доспеваат во август и декември 2026 година.

Вкупниот главен износ што мора да се врати врз основа на тие два заеми изнесува две милијарди долари. Покрај тоа, голем дел од парите ќе одат за отплата на доспеани државни обврзници продадени на домашниот пазар, како и за исполнување на обврските кон Меѓународниот монетарен фонд.

За да се обезбедат потребните средства, државата планира да се задолжи од три главни извори. Планирано е да се земат до 380 милијарди динари (околу 3,24 милијарди евра) од заеми од домашни и меѓународни финансиски институции, потоа до 320 милијарди динари (околу 2,73 милијарди евра) преку емисија на државни обврзници на домашниот пазар и до 260 милијарди динари (околу 2,22 милијарди евра) преку емисија на еврообврзници на меѓународниот пазар.

Значителен дел од долгот, дури 234,4 милијарди динари (две милијарди евра), е планиран како општа поддршка на буџетот преку заеми од странски влади и фондови.

Покрај општото задолжување, Владата планира да земе и голем број наменски заеми за финансирање на капитални проекти. Поголемиот дел од парите од ваквите заеми се наменети за транспортна и енергетска инфраструктура.