Тренчевска: Со социјалното претприемништво креираме нови работни места

Министерката за труд и социјална политика Јованка Тренчевска и тим лидерката на проектот на „Поттикнување на социјалното претприемништво“, Барбара Садовска, финансиран од ЕУ, денеска имаа средба на која констатираа дека заштитата и помошта од институциите е клучна во поддршката на социјалното претприемништво преку кое ранливите групи добиваат шанса да се вклучат во заедницата.

Тренечевска, како што соопшти МТСП, рекла дека институциите покажаат кохезија и соработка во овозможувањето на условите за работа се со цел да се намали нееднаквоста.

-Со институционалната поддршка за социјалното претприемништво,  ги  решаваме предизвиците и на централно и на локално ниво поврзани со сиромаштијата, невработеноста и други социо-економски прашања во врска со интеграцијата на ранливите  групи. Социјалните претпријатија ќе придонесат во креирање на нови работни места за ранливите групи. На крајот на минатата година го отворивме и Националниот центар за поддршка на социјалните претпријатија кој овозможува финансиска поддршка но, пред се едукација и обука на социјалните претпријатија. Со новото законско решение за социјални претпријатија, кое очекуваме  да се донесе оваа година, освен што ќе го уредиме основањето,  ќе го уредиме и системот на следење на работата на социјалните претпријатија, воспоставената структура за поддршка и проценката на  ефектите од мерките, посочила Тренчевска на средбата.

Тим лидерката на проектот на „Поттикнување на социјалното претприемништво“, пак, истакнала дека суштината на проектот е да биде воспоставена институционалната поддршка за која наскоро очекува законско решение кое ќе овозможи одржливо решение.

-Социјалното претприемништво и претпријатија  им овозможуваат на локалните заедници поуспешен развој. Законската легислатива им е потребна за да можат социјалните претпријатија успешно да работат и да имаат инклузивна улога во вклучување на ранливите групи во локалните заедници, рекла Садовска.

Минатата година во август Владата ја усвои Националната стратегија за социјалните претприемништво 2021 – 2027 година, со двегодишен акциски план 2021-2023 година.