Цената на златото на светските пазари останува на високо ниво, поттикната од зголемената побарувачка за сигурни инвестиции во време на економска неизвесност и геополитички тензии. Според последните податоци од меѓународните пазари, една унца злато (31,1 грам) се продава за околу 4.403 до 4.405 евра, што е близу до историски максимум. Во превод, еден грам чисто злато (24 карати) на глобалниот пазар вреди приближно 141 евра.
Финансиските аналитичари посочуваат дека растот на цената е резултат на комбинација од фактори – инфлација, нестабилни финансиски пазари и зголемено купување злато од страна на централните банки.
„Во периоди на глобална неизвесност инвеститорите традиционално се свртуваат кон златото како сигурно прибежиште за капиталот“, велат пазарни аналитичари.
Во последните години златото повторно станува една од најбараните инвестиции. На неговата цена директно влијаат неколку глобални фактори како инфлацијата и порастот на цените, каматните стапки на централните банки, вредноста на американскиот долар, геополитички конфликти и политичка нестабилност и зголемени резерви на злато кај централните банки. Во вакви услови, инвеститорите често ги намалуваат вложувањата во поризични средства како акции или криптовалути и се префрлаат кон благородни метали.
Тргувањето со злато денес е многу подостапно отколку порано. Покрај традиционалното купување на физичко злато, постојат и неколку современи начини за инвестирање.
Најтрадиционалниот начин е купување златни плочки или инвестициски монети, кои инвеститорите ги чуваат како долгорочна заштита од инфлација. Пазарните експерти сметаат дека интересот за златото ќе остане висок и во наредниот период, особено ако продолжи глобалната економска неизвесност.
Некои прогнози дури укажуваат дека цената на благородниот метал би можела дополнително да расте доколку централните банки продолжат да ги зголемуваат своите златни резерви.