Во Германија состојбата со недостигот на квалификувана работна сила во првиот квартал од оваа година дополнително се влоши.

Според податоците на Институтот за германска економија (IW), бројот на непополнети работни места за кои работодавците не можат да најдат соодветна работна сила се зголемил за дополнителни 88.000 во март и сега е на рекордно ниво од 558.000.

Недостигот од квалификувани работници, според истражувањето, ги погодува сите сегменти на пазарот на трудот, но особено е изразен во областа на здравството, социјалната помош, образованието и градежништвото.

Само во секторите здравство, социјална помош и образование, шест од десет работни места не се пополнети поради недостаток на соодветна работна сила, се вели во соопштението на IW. Во пандемските години 2020 и 2021 година, приливот на квалификувана работна сила од странство забави, но трендот на зголемување на бројот на непополнети работни места започна многу порано. Една од причините е пензионирањето на нумерички силната генерација од средината на педесеттите.

Во саботата беше објавена информацијата на федералната влада, според која во последните години расте бројот на пензионери, т.е. лица кои наполниле 67 години и кои се уште се активни на пазарот на трудот. Минатата година 1,05 милиони жители на возраст над 67 години биле во некаков облик на вработување, што е значително зголемување во однос на 2010 година кога само 685.000 пензионери сè уште оделе да работат покрај пензијата.

Оваа појава се поврзува со недостиг од стручни лица, поради што работодавачите и по пензионирањето ги враќаат многу квалификувани работници на старите работни места. Покрај зголемениот увоз на експерти од земјите на Европската унија, Германија го олесни процесот за добивање работни и дозволи за престој за жителите на земјите кои не се членки на ЕУ.

Така, од 2016 година на сила е програмата за вработување работници од Западен Балкан, која овозможува миграција на германскиот пазар на труд. Веднаш по почетокот на војната во Украина, работодавачите и синдикатите побараа од властите да ги отстранат бирократските пречки за што поскоро да ги интегрираат бегалците од Украина на германскиот пазар на труд.

Побарувачката за работници во Германија е поголема од кога било. Индексот на работни места BA-X на Германската Федерална агенција за вработување во април беше повисок од кога било за 138 поени, објави Федералната агенција за вработување минатиот месец.

Според истиот извор, крајот на повеќето ограничувања за коронавирусот и пролетното заживување на пазарот на труд придонесоа за растот во март. Зафатени се речиси сите сектори, особено угостителството, јавува DPA.