Италијанската „Монте деи Паски ди Сиена“ започна голема аквизиционa офанзива, со две одделни понуди за преземање на „Банко БПМ“ и „Банка Џенерали“, во обид да ја зајакне својата позиција на пазарот и да спречи преземање од страна на „Интеза Санпаоло“. Вкупната вредност на понудите достигнува околу 34 милијарди евра, односно приближно 40 милијарди долари.
Операциите се целосно структурирани преку размена на акции, без готовинска компонента. Понудата за „Банко БПМ“ го проценува преземањето на околу 25,3 милијарди евра, додека за „Банка Џенерали“ се нудат околу 8,7 милијарди евра. Двете понуди можат да се реализираат независно една од друга.
Потегот на „Монте деи Паски“ доаѓа во момент кога банката се обидува да се спротивстави на понудата на „Интеза Санпаоло“, која претходно понуди околу 36 милијарди евра за преземање на сиенската банка. Наместо да стане дел од поголем конкурент, раководството на „Монте деи Паски“ предлага создавање нов голем италијански банкарски субјект.
Доколку двете трансакции бидат успешно реализирани, новата групација би имала пазарна капитализација од околу 70 милијарди евра и би се позиционирала меѓу најголемите банки во Европа.
Со оваа стратегија „Монте деи Паски“, една од најстарите активни банки во светот, се обидува не само да ја зачува својата самостојност, туку и значително да го зголеми своето влијание во италијанскиот финансиски сектор.
Операцијата претставува уште еден знак дека консолидацијата на италијанскиот банкарски сектор продолжува со забрзано темпо, а исходот ќе зависи од ставот на акционерите и регулаторните одобренија.