Федерален судија во вторникот ја паузираше тужбата против американското Биро за финансиска заштита на потрошувачи (CFPB), која имаше за цел да ги поништи прописите за „open banking“. Судот го одобри барањето на агенцијата за време за да ги замени спорните правила, усвоени за време на поранешниот претседател Џо Бајден, со нова верзија, покажуваат судските документи.

Потегот на CFPB под администрацијата на претседателот Доналд Трамп претставува пресврт, бидејќи агенцијата претходно тврдеше дека правилата треба целосно да се поништат. Правилата беа замислени за да им овозможат на потрошувачите поголема контрола врз сопствените финансиски податоци и да поттикнат иновации.

„Имајќи ги предвид неодамнешните случувања на пазарот, бирото сега одлучи да започне нов процес на изработка на прописи со цел да го преиспита правилото, значително да го ревидира и да обезбеди силно образложение,“ соопшти CFPB во судскиот поднесок, додавајќи дека ќе започне „забрзан“ процес на донесување правила во рок од три недели.

За време на мандатот на Бајден, CFPB предложи прописи за регулирање на размената на податоци помеѓу финтек компании и традиционални банки, што ќе им овозможи на потрошувачите бесплатно да ги пренесуваат своите лични податоци меѓу даватели на услуги. Овие прописи, предвидени со законот Dodd-Frank од 2010 година, беа насочени и кон намалување на трошоците и зголемување на понудата на услуги за потрошувачите.

Сепак, банкарската индустрија брзо поднесе тужба за блокирање на делови од правилото, тврдејќи дека тоа ќе ја загрози приватноста и безбедноста на податоците на клиентите. Финтек секторот, пак, тврдеше дека прописите нудат заштита и дека нивното укинување претставува услуга на големите банки која ја задушува конкуренцијата. Во мај, CFPB ѝ кажа на судот дека верува оти правилата ги надминуваат законските овластувања на агенцијата и треба да бидат укинати.

Почетокот на месецов, Bloomberg објави дека JPMorgan планира да им наплаќа на финтек компаниите пристап до податоците на своите клиенти.

Американскиот окружен судија Дени Ривс изјави дека го одобрил барањето на CFPB за пауза делумно затоа што тоа ќе и овозможи на агенцијата да соработува со засегнатите страни и со пошироката јавност за редизајн на прописите.

Според поднесокот на CFPB, Банкарскиот Политички Институт (Bank Policy Institute), индустриска трговска организација, се спротивставил на одобрувањето на паузата. Но, финтек групите изразија надеж дека ќе учествуваат во процесот за изработка на новите правила.