Министерството за економија и труд преку Агенцијата за вработување објави јавен повик за мерката „Поддршка за креирање на нови работни места преку зелени инвестиции“, дел од оперативниот план за активни програми и мерки за 2025 година.
Мерката овозможува вклучување на 200 невработени лица, кои ќе бидат ангажирани во микро, мали и средни претпријатија што инвестираат во зелени технологии, производи и процеси.
Финансиската поддршка се доделува како неповратен грант:
- 250.000 денари за едно ново работно место
- 500.000 денари за две нови работни места
- 750.000 денари за три нови работни места
Средствата можат да се користат за набавка на нова опрема, машини, софтвер и лиценци, како и опрема за обновливи извори на енергија и материјали за енергетска ефикасност.
Право на учество имаат микро, мали и средни претпријатија од приватниот сектор, со приоритет за компании од секторите: преработувачка индустрија, земјоделство, шумарство и водостопанство, снабдување со вода и управување со отпад, градежништво и транспорт.