Одлуката на САД да воведат дополнителни царини за француските вина и коњак, покрај оние што веќе беа воведени во октомври минатата година, ќе го чини францускиот сектор за вино и алкохолни пијалоци вкупно повеќе од милијарда евра, соопштија извозниците.
Владата на САД во средата (30-ти декември) објави дека ќе ги зголеми тарифите за одредени производи од Европската унија, вклучувајќи вино и коњак и други алкохолни пијалоци од Франција, влошувајќи го долготрајниот спор со Брисел околу субвенциите за производителите на авиони, пренесува Ројтерс.
Во ноември 2019 година, САД воведоа царини од 25 проценти за увоз на голем број прехранбени производи од Европската унија, вклучително и француски вина, што го чинеше секторот вино и алкохолни пијалоци вкупно 600 милиони евра во текот на изминатата година, соопшти Француската асоцијација на извозници на вино.
„Вкупниот ефект на тарифите (воведен во октомври 2019 година и овие нови царини) врз секторот вино и алкохолни пијалаци како целина ќе надмине една милијарда евра“, изјави за Ројтерс Сезар Гирон, претседател на Здружението на извозници на вино и алкохолни пијалоци (FEVS).
„Тоа е вистински удар во спорот што нема никаква врска со нас“, додаде тој.
Тој исто така предупреди дека новите тарифи ќе имаат значително влијание врз продажбата на коњак во САД.