Четириесет и еден отсто од работната сила размислува за драстична промена во кариерата следната година.
Податоците се од најновиот извештај на „Мајкрософт”, Работниот тренд на индексот на „Мајкрософт”, студија која цитира информации од 30.000 вработени ширум светот преку „Мајкрософт 365″ и „ЛинкедИн”.
Во последните 18 месеци, многу луѓе се бореа со стресот што ја придружува глобалната пандемија – се грижат за здравјето на најблиските, се обидуваат да ја балансираат работата со училиште-од-дома и грижата за децата, имаат чувство на изолација и осаменост.
„Денес, нашето истражување покажува дека 41 процент од глобалната работна сила веројатно ќе размисли да го напушти сегашниот работодавач во текот на следната година, со 46 проценти да планираат да направат транзиција во кариерата”, пишува во извештајот.
Работата е исто така предизвик
Повеќе од половина од вработените (54 отсто) рекле дека се чувствуваат преоптоварени. Виртуелните состаноци, е-пошта и пораките драматично се зголемија откако работата од далечина и хибридните методи станаа нова норма.
Сепак, менаџерите и носителите на одлуки се справиле многу подобро – 61 отсто од лидерите и високите извршни директори велат дека успеваат – 23 отсто повеќе од луѓето кои не се овластени да донесуваат одлуки. Истражувањата покажуваат дека ова веројатно се должи на низа фактори, како што е фактот дека вработените на високи позиции имаат поголема мрежа на професионална поддршка и можност да земат повеќе одмор.