Аргентина и Кина го официјализираа проширувањето на договорот за размена на валути, дозволувајќи ѝ на јужноамериканската земја да ги зголеми исцрпените девизни резерви, соопшти во неделата аргентинската централна банка, пренесува Ројтерс.
Владата на Аргентина треба да ги обнови резервите за да ги покрие трговските трошоци и идните отплати на долгот, а повеќе резерви се клучна цел на големиот договор за долг со Меѓународниот монетарен фонд (ММФ).
Претседателот Алберто Фернандез го објави договорот во ноември минатата година и рече дека тогаш тој вреди 5 милијарди долари.
Шефовите на аргентинската и кинеската централна банка „потврдија дека договорот за размена на валути меѓу двете институции е активиран и посветен на продлабочување на употребата на кинескиот јуан на аргентинскиот пазар“, се вели во соопштението на централната банка.
Кина е вториот најголем трговски партнер на Аргентина, по Бразил, и втора најважна дестинација за аргентинскиот извоз.
„Свопот се состои од размена на валута за зајакнување на меѓународните резерви од 130 милијарди јуани и специјално активирање од 35 милијарди јуани за компензација на операциите на девизниот пазар“, се вели во соопштението.