Членовите на Европскиот парламент го одобрија амбициозниот нацрт-закон (MiCA) во кој Брисел за прв пат се обидува да го регулира пазарот на криптовалути.
Европскиот комесар за финансиска стабилност и финансиски услуги Мериад Мекгинис очекува дека MiCA ќе стане валиден закон во ЕУ од јули, откако ќе биде одобрен од парламентите на земјите-членки на Европската унија, пренесува Bloomberg.
Како што видовме во последните месеци, очајно е потребен надзор и построги правила за да се избегне колапс сличен на оној на FTX, Terra Luna, Celsius и Voyager, додаде комесарот Мекгинис.
Делот од законот кој се однесува на стабилните крипто валути ќе стапи на сила дури во јули следната година. Според законот MiCA, секоја компанија која нуди услуги поврзани со криптовалути во Европската унија ќе мора да биде регистрирана во една од земјите-членки, што ќе и овозможи да работи низ ЕУ.
Надлежните власти на ЕУ ќе ја следат работата на платформите за тргување со криптовалути и ќе се погрижат да не се повтори падот на пазарот, како во добро познатиот случај на крипто берзата FTX. Законот кој се подготвуваше три години има свои критичари, а многумина се жалат дека не е во чекор со времето и не одговара на актуелните проблеми поврзани со криптовалутите. MiCA на никаков начин не реагира на понови феномени како што се заеми со криптовалути, децентрализирано финансирање криптовалути без посредници (DeFi) или незаменливи токени (NFTs).
Шефот на Европската централна банка, Кристин Лагард, веќе побара усвојување на нов, подобрен закон, MiCA 2, поради споменатите недостатоци.Покрај тоа, новите правила ја загрозуваат анонимноста на корисниците на криптовалути, бидејќи MiCA ги принудува крипто-размените да објават информации за трансакциите, односно идентитетот на испраќачите и примателите.
Шефовите на крипто индустријата генерално велат дека законот е „подобар од ништо“ и го фалат пристапот на Европа кон пазарот на криптовалути кој не е толку угнетувачки како оној на САД.