Европските банки обезбедуваат милијарди долари за поголемо производство на нафта и гас, покажа извештајот објавен во понеделникот, и покрај упатствата на Меѓународната агенција за енергија (ИЕА) кои треба да го запрат глобалното затоплување.
Во текот на 2021 година, дваесет и пет водечки банки во Европа обезбедија 55 милијарди американски долари за енергетските компании кои планираат да го зголемат производството на нафта и гас, се вели во извештајот на непрофитната одговорна инвестициска асоцијација ShareAction.
Иако сумата е речиси за половина помала од 2020 година, а заостанува зад 2019 година, кога изнесуваше 83 милијарди долари, ги надмина и 2018 и 2017 година, кога издвоија 49, односно 50 милијарди долари за финансирање на вакви проекти.
Поголемата финансиска поддршка е во судир со препораката на ИЕА од мај минатата година дека не треба да се инвестира во нови наоѓалишта на нафта и гас, така што светот има 50 отсто шанси да го ограничи глобалното затоплување на 1,5 степени Целзиусови над просекот од прединдустрискиот период.
Износот беше зголемен и покрај фактот што 24 банки самите се обврзаа да ги декарбонизираат кредитните портфолија, според извештајот на ShareAction.
Најголеми суми обезбедија HSBC, Barclays и BNP Paribas, покажа анализата.
ShareAction ги повика инвеститорите да побараат од банките да спроведат мерки кои ќе го ограничат финансирањето на нафта и гас и да ги поддржат одлуките насочени кон борба против климатските промени на годишните состаноци.