Јужнокорејскиот производител на автомобили Hyundai ќе се приклучи на егзодусот на мултинационалните компании од Русија со продажба на своето локално производство по номинална цена. Одборот на директори ги одобри плановите за продажба на уделот на компанијата во Hyundai Motor Manufacturing на руската компанија Art-Finance за 10.000 рубли (100 евра), соопшти денеска компанијата.
“Hyundai преговара со Art-Finance за деталите од договорот. Со цел да ги поддржи сопствениците на возилата Hyundai во Русија, Hyundai ќе продолжи да обезбедува услуги за клиентите по продажбата”, изјави портпаролката на компанијата. Art-Finance е филијала на рускиот дилер на автомобили Авилон.
Бизнисот мирува од март минатата година
Монтажните линии во главната фабрика на HMMR во Санкт Петербург, отворена во 2010 година, не работат од март 2022 година, веднаш по почетокот на руско-украинската војна, како резултат на тесните грла во снабдувањето со делови.
Hyundai претходно произведуваше околу 200.000 автомобили годишно во таа фабрика, објавија јужнокорејските медиуми. Во март оваа година, Hyundai објави дека сè уште истражува различни опции во врска со своето работење во Русија.
Според берзата на Hyundai, продажбата треба да биде завршена до 28 декември, а зделката вклучува и опција за откуп.
Во одлуката на управниот одбор на Hyundai е вклучена и продажбата на затворената фабрика на General Motors во Санкт Петербург. Хјундаи ја презеде таа фабрика со годишен капацитет од 100.000 автомобили пред три години, но таа никогаш не беше ставена во функција.