Хрватската влада подготви серија ограничувања на цените, намалувања на ДДВ и субвенции за да им помогне на домаќинствата, компаниите и земјоделците да се борат против зголемените цени на енергијата, а пакетот е вреден 4,8 милијарди куни (637 милиони евра), рече премиерот Андреј Пленковиќ.
Поскапувањето на струјата за домаќинствата ќе се ограничи на 9,6 отсто над сегашното ниво, а поскапувањето на природниот гас на 20 отсто, изјави Пленковиќ за медиумите.
Цените на струјата за домаќинствата во Хрватска не се променети од јануари 2019 година.
Државната „Хрватска електропривреда“ (ХЕП) исто така ќе сноси дел од товарот на поскапувањето на струјата за потрошувачите, рече Пленковиќ, додавајќи дека мерките за поддршка ќе стапат на сила од 1 април.
Данокот на додадена вредност (ДДВ) за продажба на топлинска енергија трајно ќе се намали на 13%, од 25% и со тоа ќе стане еднаков на стапката на ДДВ за електрична енергија. ДДВ-то на природниот гас, кој моментално изнесува 25%, ќе се намали на 5% од 1 април 2022 година до 31 март 2023 година, за потоа да се зголеми на 13%.
Стапката на ДДВ од 13% ќе се намали на 5% за свежо месо, риба, јајца, овошје, зеленчук, масло за јадење, храна за бебиња…
Пакетот за поддршка вклучува и финансиска помош за пензионерите и енергетски сиромашните домаќинства, како и субвенции за трошоците за гас за малите и средни претпријатија.