Кинеската централна банка повторно во четвртокот го девалвирана јуанот, најмногу во последните три месеци, со цел да се намали влијанието на зајакнувањето на доларот преку фиксен девизен курс и со тоа да обезбеди поддршка на конкурентноста на домашните извозници.
Новиот фиксен девизен курс на јуанот во однос на доларот е 6,4891 јуани за долар, со што вредноста на кинеската валута во однос на доларот се намали за 0,46 проценти во однос на претходниот ден, покажува кинескиот систем на трговија со валути. Исто така тоа е најголем дневен пад на вредноста на јуанот во однос на доларот од јануари.
Властите дозволуваат дневно зајакнување или слабеење на јуанот за максимум од два проценти, со цел да се спречат осцилации и да ја задржат контролата врз девизниот курс.
Послабиот јуан треба да ги поевтини кинеските производи на светските пазари, а девалвацијата во август минатата година и во јануари оваа година ги поттикнаа стравувањата во странство дека Пекинг се обидува да ја намали вредноста на домашната валута со цел да се обезбеди конкурентна предност на кинеските извозници. Кинеските официјални лица постојано ги негираат овие тврдења.
Откако во август минатата година ги вознемири инвеститорите со неочекуваното слабеење на стабилниот девизен курс на јуанот во однос на доларот за речиси пет проценти за една недела, Пекинг вложи големи суми за поддршка на националната валута и ограничување на одливот на капитал.