Цените на храната нагло се зголемија во ноември, приближувајќи се на рекордот од шест години, поттикнат од „неверојатниот“ пораст на цената на растителните масла, објави во четвртокот Агенцијата за храна и земјоделство на Обединетите нации (ФАО).
Индексот на ФАО, кој ги мери месечните промени во кошничките цени на основните прехранбени производи, во ноември во просек изнесуваше 105,0 поени, што е највисока вредност од декември 2014 година.
Во споредба со октомври, тој се зголеми за 3,9 проценти, што е најсилно од јули 2012 година, забележува агенцијата на ООН.
Цените на растителните масла најмногу пораснаа минатиот месец за „неверојатни“ 14,5 проценти во споредба со октомври, предводени од зголемувањето на цената на палминото масло поради наглиот пад на глобалните резерви.
Индексот на цените на житото порасна за многу поскромни 2,5 проценти од октомври, како одраз на повисоките цени на извозот на пченица како резултат на „намалените проценки на жетвата“ во Аргентина. Цените на пченката исто така се зголемија, делумно поради пониските прогнози за приносот во САД и Украина.
Во споредба со ноември минатата година, цените на житото се зголемија за 20 проценти.
Цените на шеќерот пораснаа во просек за 3,3 проценти во споредба со октомври, поради стравот од намалено глобално производство во новата земјоделска сезона, со оглед на лошите временски услови што ги намалија проценките на приносот на шеќерна репка и трска во ЕУ, Русија и Тајланд.
Индексот, кој ги мери цените на млекото и млечните производи, се зголеми за 0,9 проценти во ноември во однос на октомври, приближувајќи се на рекордот од пред година и пол, поддржан од повисоките цени на путерот и сирењето и големиот раст на продажбата во Европа за време на ниската сезона.
Истиот процентен раст е забележан и во индексот што го мери движењето на цените на месото, како одраз на растот на цените на говедското, овчото и свинското месо.