По 29 години Албанија ја напушти листата на земји под надзор на Советот на Европа. Одлуката беше донесена вчера, 17 април, едногласно во Парламентарното собрание.
Министерот за надворешни работи Игли Хасани преку објава на социјалните мрежи реагираше, оценувајќи ја веста како потврда за признавањето на „трансформативните реформи“ во судството и борбата против корупцијата во Албанија.
Хасани посочува дека Албанија „непоколебливо“ ќе продолжи со посветеноста на стандардите на Советот на Европа.
„Посветеноста на Албанија кон стандардите на Советот на Европа е непоколеблива и нашите континуирани напори конечно ги даваат долгоочекуваните резултати“, рече Хасани.
Советот на Европа го оцени напредокот на Албанија во текот на овие години, со главна реформа во судството. Извештајот го оценува и третманот на малцинствата и ранливите групи во земјата, но не го изостави напредокот во демократијата, пишува Косев.