И додека вредноста на турската лира стрмоглаво паѓа и им задава грижи на многу Турци, соседите од Бугарија и од Грција задоволно ги тријат рацете: шопингот во Турција никогаш не бил поисплатлив од сега.

Првата пауза по преминувањето на границата е во градот Едрене, првото поголемо место на автопатот од Софија кон Истанбул. Тука се менуваат пари: бугарскиот лев за турската лира. Секој ден курсот за бугарските шопинг туристи е сѐ поповолен.

Незадоволни Турци, задоволни Бугари

Хатиџе Ахмедова, Бугарка со турско потекло, се качила во автобусот во три часот наутро и сега, откако промени околу 200 бугарски лева (околу 100 евра), се упати во првата продавница. За турското малцинство во Бугарија шопингот во соседството е сѐ уште атрактивен и поради тоа што нема ни јазични бариери.

Гулфија Осинова, која допатувала со истиот автобус, е веќе во потрага за подароци за внуците во продавниците. „Во Бугарија сѐ е многу поскапо“, вели оваа 60 годишна жена.

Сето тоа благодарејќи на екстремната инфлација во Турција, која во меѓувреме достигна загрижувачка вредност од над 20 отсто. Од почетокот на годината турската лира во споредба со доларот загуби 60 насто од вредноста. Последици за Турците – сѐ поскапува, а платите не растат со иста брзина. Затоа Бугарите се враќаат задоволни со полни багажници.

„Купуваат како луди“

Булетин Реисоглу, директор на трговското здружение Улис од Едрене вели дека бројот на шопинг туристите се зголемил четирикратно во последните неколку недели. „Паркингот е полн со автомобили со бугарски таблички. Веќе е речиси невозможно да се најдат домашни таблички или оние од Истанбул“, вели Реисоглу. Тој вели дека Бугарите „купуваат како луди“ и тоа големи пакувања како наскоро да ќе снема стока.

Шопинг туристите не доаѓаат само од Бугарија туку и од соседна Грција на кои Турција им е уште поповолна отколку на Бугарите. Во моментов најмногу купуваат подароци за божиќните празници. „Среќна сум што тука можам да ги купам сите подароци за моите“, мели Есра Мола која дошла на еден ден од грчкото гратче Орестијада кој се наоѓа од другата страна на границата.

Цените на производите во турските продавници се менуваат речиси секој ден

Цените на производите во турските продавници се менуваат речиси секој ден

И покрај напорите турската влада да го запре падот на вредноста на лирата, турската валута во споредба со еврото загуби уште 40 насто во споредба со почетокот на годината.

Турскиот претседател, Реџеп Таип Ердоган, сè уште инсистира на својата политика на ниски каматни стапки, кои ја девалвираат националната валута. Но, претседателот сака евтини кредити, економски раст и повеќе извоз. За барем малку да ги ублажи страдањата на народот кои на студ чекаат во ред за поволен леб, Ердоган им наложи на трговците да ги намалат цените. Но, трговците досега не ги послушаа овие „препораки“.

Во меѓувреме, редовите на бугарско-турската граница секој ден се сѐ подолги.

 

Извор: DW