Регионална конференција за родово одговорно буџетирање почнува денеска во Скопје, на која ќе бидат презентирани најдобрите практики во регионот и најновите трендови за буџетирање за еднаквост.
Конференцијата која ќе трае до утре ја организира Канцеларијата на UN Woman во партнерство со Владата.
На конференцијата е најавено учество и воведни обраќања на министерката за труд и социјална политика Мила Царовска, министерот за финансии Драган Тевдовски, швајцарската амбасадорка Сибил Сутер Тејада, раководителот за соработка на делегацијата на ЕУ, Никола Бертолини, заменик-регионален директор в.д. за Европа и Централна Азија во UN Woman Микеле Рибота.
Тие ќе говорат на тема воведување родовата димензија во политиките и родовото одговорно буџерирање.
На конференцијата е најавено и учество на високи функционери и експерти од земјата и од Албанија, Србија, Косово, Босна и Херцеговина, Украина, Молдавија и Турција.
Владините и невладините претставници ќе имаат можност да дискутираат за родово одговорно креирање на политики и да споделат добри практики во вклучувањето на родовите прашања во секторските политики на централно и локално ниво.
Конференцијата има цел да служи како платформа за дебатирање за клучните трендови и случувања на полето на родово одговорното буџетирање, истакнувајќи го напредокот постигнат во земјите и на регионално/глобално ниво.
Се очекува оваа конференција да отвори нови можности за зајакната соработка и вмрежување меѓу владите и да го отвори патот за идните регионални интервенции за родово одговорно буџетирање.