Повеќе од 13 милиони жители на Германија живеат во сиромаштија, а земјата во 2025 година ја забележа највисоката стапка на сиромаштија досега, покажува нов извештај на Здружението за благосостојба на Паритет.
Според податоците, стапката на сиромаштија се искачила на 16,1 отсто, што значи дека речиси секој шести жител на Германија се соочува со ризик од сиромаштија.
„Социјалните поделби во Германија се продлабочуваат. Во исто време, јазот меѓу регионите и демографските групи расте. Сиромаштијата станува особено изразена кај постарите лица, жените и самохраните родители“, изјави Јоаким Рок, извршен директор на здружението.
Според европската методологија, за сиромашни се сметаат лицата чии приходи се под 60 проценти од националниот медијален приход. Во Германија тоа значело месечен приход под 1.446 евра за едночлено домаќинство, односно под 3.036 евра за четиричлено семејство со две деца.
Во извештајот се наведува дека голем број домаќинства се соочуваат со потешкотии во покривањето на секојдневните трошоци поради зголемените сметки за енергија и растечките животни трошоци.
Особено загрижувачки се податоците за повозрасните граѓани. Стапката на сиромаштија кај лицата постари од 65 години достигнала 19,5 отсто, додека кај жените над 75 години изнесува дури 21,3 проценти.
Најголем ризик од сиромаштија имаат лицата кои живеат сами, каде што стапката достигнува 30,3 проценти, како и самохраните родители со 28,9 проценти.
Рок предупреди дека дополнителни кратења на социјалните програми би можеле уште повеќе да ја влошат состојбата.
„Фактот што постарите лица и семејствата со деца се меѓу најпогодените укажува на слабости во социјалниот систем. Новите намалувања нема да ги решат кризите, туку ќе ги продлабочат“, порача тој.