Само мал дел од вработените во британската компанија ќе бидат пренасочени кон Холандија и Франција
Најголемиот светски фонд за управување со средства, BlackRock, ќе го задржи своето главно европско седиште во Велика Британија и откако земјата ќе ја напушти Европската унија (ЕУ), придвижувајќи само дел од своите вработени во Холандија и Франција, објави Ројтерс.
Одлуката на американската компанија, која вработува околу 3.000 вработени во Обединетото Кралство и управува со средства од околу 6.3 трилиони долари, ќе го задржи статусот на канцеларијата во Лондон како најголем меѓу нејзините европски подружници.
Веста е добредојдена за Лондон и владата на премиерот Тереза Меј, која продолжува да бара опција за балансирање меѓу британските политичари и ЕУ.
BlackRock е меѓу најпрофитабилните финансиски компании, на која и претстои да ги објави своите планови за Brexit во наредните недели, а веќе се подготвува за најлошото сценарио при преговорите меѓу Лондон и Брисел.
Американската компанија соопшти дека направила две големи промени во својата структура во Европа. Првата вклучува претворање на нејзиниот канцеларија во Холандија во главно европско седиште за поголем дел од бизнисот за нејзино опслужување на клиентите од ЕУ.
Втората промена, потврдена уште во септември, ќе биде направена во канцеларијата во Париз кој ќе се претвори во своевиден центар на “алтернативните” инвестиции како недвижностите и инфраструктурата.
“Се подготвуваме за оперативните, правни и стратешки последици од Brexit во следните неколку години и во оваа фаза може да кажеме дека многу малку сегменти од нашиот европски бизнис ќе бидат погодени од нашето решение за продолжување на регулаторните дозволи за постоечките структури во континентална Европа”, соопшти компанијата.
Општите поместувања на персонал од Велика Британија кон континентална Европа во следните неколку години ќе бидат минимални, споделува извор, запознаен со случајот. Холандската канцеларија ќе додаде помеѓу 10 и 20 вработени од Велика Британија.
Единицата на BlackRock во Париз ќе ја удвои големината на својот персонал, и се очекува поголем дел од вработените да бидат ангажирани на локално ниво.
Сепак компанијата ја остава вратата отворена за идни рокади, во зависност од тоа како ќе завршат разговорите по излегувањето на Велика Британија од ЕУ.