Европската банка за обнова и развој (ЕБОР) обезбедува кредитна линија во износ од 20 милиони евра на Шпаркасе банка Македонија, за кредитирање на локалните приватни бизниси и корпорации погодени од пандемијата на коронавирусот.

Македонската економија е помалку зависна од туризмот во споредба со земјите на Западен Балкан, но производството и трговијата имаат силно влијание. Новото финансирање е витално за надминување на моменталната криза, а преку Шпаркасе банка Македонија, ЕБОР ќе може да ги поддржи компаниите на кои им е потребна помош.

ЕБОР брзо одговори на ковид-19 кризата преку лансирање на Пакетот за солидарност. Банката очекува вкупните инвестиции да достигнат до 21 милијарда евра во 2020-21 година и да бидат насочени кон одговор и обнова на економиите од пандемијата на коронавирусот.

 

Шпаркасе банка Македонија е основана во 1992 година и е долгорочен партнер на ЕБОР. Таа е дел од Ерсте и Шпаркасе Групацијата, со удел на пазарот во Северна Македонија од над 5,5%во корпоративниот сегмент. Нејзината силна локална мрежа во земјата ќе обезбеди финансирањето на малите бизниси да биде пошироко достапно.

-Горди сме што го потпишуваме овој договор со Шпаркасе банка Македонија, нашиот долгорочен партнер. Посветеноста на банката да го опслужува приватниот сектор и нејзината одлична позиционираност во земјата, ја прават идеален партнер за пласирање на средствата на ЕБОР и обезбедување на помош и ликвидност на компаниите кои поминуваат во овој период на досега невидена неизвесност. Обезбедувањето на финансиска помош и ликвидност за време на овие тешки времиња е есенцијално за поддршка на целата економија во земјата, изјави Анди Аранитаси, претставник на ЕБОР за Северна Македонија.

Глигор Бишев, главен и извршен директор на Шпаркасе банка Македонија, изјави: „Шпаркасе банка Македонија водена од принципите на општествено одговорно работење на Штаермеркише Шпаркасе Групацијата и согласно усвоените мерки на Министерството за финансии и Владата на Република Северна Македонија, разви мерки и решенија за поддршка на долгорочни одржливи бизниси кои во моментов се погодени од пандемијата на ковид-19. Ќе продолжиме преку нашето партнерство и поддршка од ЕБОР да работиме заедно со нашите клиенти со цел да придонесеме колку што може повеќе во минимализирање на негативните ефекти од коронавирусот во нашата земја.”

ЕБОР е главен институционален инвеститор во Северна Македонија. До денес има инвестирано над две милијарди евра во 133 проекти во земјата.

Шпаркасе банка Македонија АД Скопје е дел од Ерсте и Шпаркасе Групацијата, која се состои од 49 банки штедилници со скоро 2 века постоење на финансиските пазари во Република Австрија. Истовремено, Групацијата е една од најсилните банкарски групи во Европа, со што нејзината долгорочна стратешка ориентација кон регионот на Западен Балкан придонесува Шпаркасе банка Македонија да биде партнер од доверба на своите клиенти. Заедно со подружниците во Австрија, Хрватска, Босна и Херцеговина, Словенија и Црна Гора, таа е дел од сеопфатна банкарска мрежа во регионот – Штаермеркише Шпаркасе, со капитал од 17,1 милијарда евра, 3.180 вработени и 259 експозитури, кои регионално опслужуваат околу 795,273 клиенти во Штаерска и во Југоисточна Европа.