По два часа дневно, од 10 до 12, вработените од Управата за јавни приходи протестираат на работното место, без да ги извршуваат работните обврски. И вработените во судската администрација бараат повисоки плати, а од утре, со закана за блокада на граничните премини, ќе протестираат и вработените во Царинската управа.
Од синдикатот на УЈП велат дека револтот на вработените се зголемува и најавува и генерален штрајк. Тие бараат средба со министерот за финансии Фатмир Бесими, но тој не ги прими. Од Министерството за финансии само соопштија дека се подготвува општ колективен договор и дека во овој период не можат да преговараат за поединечни случаи.
Денеска Царинската управа доби нов директор, а веќе за утре е најавен получасовен предупредувачки протест, на вработените во царината. Тие бараат исплата на додатокот од 30 проценти, кој законски им следува. Ако не се исполнат барањата и тие ќе организираат генерален штрајк, а можно е и затворање на граничните премини.
Денеска во Царинската управа беше извршено примопредавање на функцијата директор на Царинската управа, каде новоназначениот директор Стефан Богоев официјално ја презема должноста од неговата претходничка Славица Кутиров.
Пред Основниот кривичен суд во Скопје неделава протестираа и вработените во судската администрација. Тие бараат враќање на додатоците на плата до 35 отсто и итно донесување на законот за судска служба. Ако има пари за 78% повисоки плати за функционерите и судиите, мора да има и за нас, велат вработените во судската администрација и најавуваат „бел штрајк“ – ќе одат на работа ама нема да ги исполнуваат работните обврски.
Судската администрација, која брои над 2.300 вработени, бара да се изгласаат законски одредби за зголемување на нивните плати, а до тогаш судските службеници да добиваат додатоци во висина од најмалку 25 отсто.
Од Владата главно одговараат дека се работи на методологија за платите во јавниот сектор.