Дополнително, на Унгарија ќе ѝ бидат исплатени 10 милијарди евра од Механизмот за закрепнување и отпорност на ЕУ
Унгарскиот премиер Петер Маѓар денес потпиша договор со претседателката на Европската комисија, Урсула фон дер Лајен, за деблокирање на речиси сите средства за закрепнување и кохезија наменети за Унгарија. Ова ѝ даде на владата пристап до износот од 16,4 милијарди евра што беше замрзнат за време на претходната влада, пишува Euronews .
Пофалби од Брисел
Фон дер Лајен ја пофали Унгарија за формирањето на владата „во рекордно време“ и за само неколку недели за започнувањето, како што оцени, „долгоодложувани реформи“. Таа најави дека на Унгарија ќе ѝ бидат исплатени 10 милијарди евра од Механизмот за закрепнување и отпорност, воспоставен по пандемијата.
„Верувам дека напорната работа сега навистина се исплати“, додаде таа. Покрај тоа, беше најавено и ослободување на 4,2 милијарди евра од кохезионите фондови и дополнителни 2,2 милијарди евра од посебна транша во рамките на истиот пакет.
Маѓар: Го направивме тоа за три недели
Петер Маѓар победи на општите избори во април, со што заврши 16-годишното владеење на Виктор Орбан. Брисел го суспендираше финансирањето за време на мандатот на Орбан поради загриженост за корупција и владеење на правото.
„Потребни беа три недели за да се направи она што Виктор Орбан не успеа да го постигне за три години“, изјави Маѓар пред новинарите, додавајќи дека тие „се бореле за целиот износ“. За целосно да се заврши ослободувањето на средствата, Унгарија сè уште треба да исполни голем број услови, таканаречени „супер-пресвртници“.