Додека светот се збогуваше со старата година, во Франција немаше ништо помалку од револуција, според претседателот Емануел Макрон. На големо задоволство на екологистите, од првиот ден од новата година во француските супермаркети веќе нема краставици, јаболка и пиперки завиткани во пластика.

Законот, кој Макрон го нарекува револуционерен, забранува пластична амбалажа за 30 видови овошје и зеленчук, вклучувајќи банани, круши, лимони, портокали и киви. Од забраната се изземени пакувањата поголеми од 1,5 кг, како и сечканото и преработеното овошје.

За некои производи, како што се чери доматите, боровинки и малини, производителите имаат подолг временски период да најдат алтернатива. До 2026 година, пластичната амбалажа ќе биде забранета за сите овошја и зеленчуци.

Емануел Макрон забраната за пластична амбалажа на свежи производи ја нарече вистинска револуција и посочи дека Франција го води светот со овој закон. Целта е да се ослободиме од сета пластика за еднократна употреба до 2040 година. Следната земја која ќе ја објави оваа забрана, од 2023 година, е Шпанија.

Потрошувачите не сакаат пластика, брендовите и супермаркетите се на потег

Се проценува дека 37 отсто од овошјето и зеленчукот во пластична амбалажа биле продадени во Франција во 2021 година. Владата верува дека забраната ќе помогне да се намалат милијардите пластични пакувања за еднократна употреба годишно.

Анкетите во европските земји покажуваат дека токму тоа го сакаат потрошувачите. Речиси три четвртини од Британците доживеале вознемиреност, фрустрација и беспомошност поради количината на пластика што ја враќаат од супермаркетот. Повеќе од половина, 59 отсто, сметаат дека брендовите и супермаркетите не прават доволно за да понудат производи без пакување или оние што можат да се надополнат, покажува истражувањето на организацијата „Пријатели на земјата“.

Анкетата спроведена од WWF во Франција во 2019 година покажа дека 85 отсто од испитаниците се за забрана на пластична амбалажа за еднократна употреба. Повеќе од 2 милиони луѓе потпишаа петиција на WWF со која ги повикуваат светските влади да ја запрат кризата предизвикана од загадувањето со пластика. Социјалните мрежи се преполни со објави на корисници лути поради нелогичната практика да се завиткува банана или краставица во неколку слоеви пластика.

Претставниците на еколошките организации го поздравуваат францускиот закон како позитивен чекор во вистинската насока. Сепак, тие не се задоволни со листата на исклучоци, која вклучува пршута, млад кромид, брокула, печурки, праски и кајсии. Францускиот директор на кампањата на WWF, Пјер Кане, истакна дека законот испраќа позитивна порака и ја става пластиката во срцето на националната дебата.

– Треба да бидеме внимателни бидејќи има уште многу работа. Сè уште сме далеку од економија без пластика и други чекори неопходни за да се запре загадувањето со пластика.

 

Извор: Ценометар.мк