По голем број барања од властите, Лондонската асоцијација на пазарот на благородни метали започна со објавување на трговски податоци
Членовите на Лондонската асоцијација на пазарот на благородни метали (London Bullion Market Association, или LBMA) продавале по барем 30,2 милиони унци злато во вредност од 36,9 милијарди долари секој ден минатата недела, изјави асоцијацијата во вторникот, претставувајќи нови податоци , кои даваат најточна слика досега за лондонскиот пазар.
Лондон е глобален центар за трговија на злато, но повеќето трансакции се прават во шалтер трансакции помеѓу банки, брокери и трговци, кои немаат тенденција да ги откриваат своите активности.
На позадината на барањата на регулаторите за поголема транспарентност членовите на LBMA почнаа да ги објавуваат трансакциите кои се случуваат во Лондон и Цирих – друг трговски центар, силно поврзан со Лондон.
“За прв пат во долгата историја на пазарот на злато во Лондон неговата големина не е предмет на шпекулации, а на сигурни индикатори”, вели аналитичарот на Macquarie Метју Тарнер во коментар кон податоците на LBMA.
Според асоцијацијата – нејзините членови минатата недела продале 95 милиони унци злато во спот-договори, 46,5 милиони унци во свопови и термински договори, 4,1 милиони унци во опции и 5,4 милиони унци во закуп, заеми и депозити.
Тоа прави во просек по 30,2 милиони унци на ден, или 939 тони дневно.
Во однос на среброто – членовите на LBMA продале 1,1 милијарди унци во спот договори, 36,7 милиони унци во опции и 43,7 милиони унци во закуп, заеми и депозити, што прави просек од 359,3 милиони унци дневно во вредност од 5,2 милијарди долари.
Волумените се малку повисоки од претходната најдобра проценка за големината на пазарот во Лондон, која претпоставуваше дека злато за околу 25 милијарди долари се тргува во градот секој ден.
Податоците сепак се пониски од обемот на продадените фјучерси на американската берза CME Group, кој минатата недела беше со промет од околу 34 милиони унци на ден злато и 552 милиони унци на ден сребро, посочува Тарнер.
Сепак, податоците на LBMA не претставуваат комплетна слика за трговијата во Лондон. Членовите на асоцијацијата го формираат поголемиот дел, но не и целата активност во Лондон, а некои членови допрва ќе почнат да го објавуваат обемот.
Здружението вели дека ќе објавува податоци еднаш неделно во текот на три месеци, пред да премине кон секојдневно известување. Здружението изјави дека планира да започне објавување на податоци и за платина и паладија.
Иницијативата е дел од поширокиот напор на LBMA да го направи пазарот на злато потранспарентен под притисокот од регулаторите и по обвиненија дека некои банки и трговци ги манипулирале цените.
Минатата година LBMA започна да објавува месечни податоци кои покажуваат колку злато и сребро се чува во сефовите за благородни метали во Лондон. Според податоците на крајот на јуни се чувале 7684 тони злато во вредност од 309 милијарди долари и 34 901 тони сребро во вредност од 18 милијарди долари.