Тројца директори на јавни здравствени установи вратиле 1,5 милион денари по откриени неправилности во платите. ФЗО најавува засилени контроли и реформи.
Скандал со неправилни исплати ја отвори темата за финансиска дисциплина во македонското здравство, откако тројца актуелни и поранешни директори на јавни установи вратиле вкупно 1,5 милион денари во буџетот. Според Фонд за здравствено осигурување, станува збор за погрешно пресметани плати, при што секој од директорите вратил по околу 500.000 денари.
Генералниот директор на Фондот, Сашо Клековски, изјави дека освен здравствените услуги, институцијата врши и редовна финансиска контрола.
„Во три случаи, актуелни или поранешни директори ги вратија погрешно пресметаните приходи од речиси еден и пол милион денари“, посочи Клековски.
Тој нагласи дека целта е воспоставување систем со поголема одговорност и почитување на правилата, без злоупотреби.
Паралелно со контролите, од Фондот најавуваат и зголемување на платите во секторот. За матичните лекари се предвидува раст на капитациите од 33 проценти, додека вкупното зголемување во јавниот здравствен сектор веќе достигнува 17 проценти, со дополнително покачување од март.
Од институцијата најавуваат продолжување на контролите и интензивна соработка со здравствените установи и синдикатите, со цел да се спречат идни злоупотреби и да се обезбеди потранспарентен систем на исплата.