Вицепремиерот задолжен за економски прашања, Фатмир Битиќи, денес се сретна со заменик-помошникот државен секретар на САД, Габриел Ескобар, кој е во работна посета на земјава, а на средбата беше придружуван од амбасадорката на САД, Кејт Мари Брнз.

Битиќи и заменик-помошникот државен секретар Ескобар разговарале за економската соработка помеѓу Северна Македонија и САД, при што се реафирмирале одличните политичко-економски односи помеѓу двете земји и било заклучено дека САД остануваат еден од најцврстите стратешки партнери на нашата земја и силен поддржувач на евро-атлантските интеграции.

Битиќи нагласил дека членството во НАТО донело стабилност и сигурност на земјата, а со тоа и зголемени можности за нови инвестиции и поголема конкуреност на меѓународно ниво, а посочил и дека Владата е посветена на реализација на сите потребни реформи и надминување на отворените прашања во насока на целосна интеграција во Европската Унија.

Ескобар и Битиќи разговарале и за унапредување на бизнис-климата, подобрување на инфраструктурната поврзаност во земјата и со соседите, како и реализација на проекти за заштита на животната средина и за одржлив економски развој, при што државниот секретар Ескобар ја потенцирал поддршката на САД за сите регионални економски соработки што носат конкурентна предност за земјите од Западен Балкан.

На средбата вицепремиерот ја потврдил нашата посветеност за Северна Македонија да стане енергетски хаб на Балканот преку диверзификација на изворите за енергија и поврзувајќи се со земјите од регионот, што секако е долгорочна стратегија, која ќе обезбеди стабилност, одржливост и предвидливост при снабдувањето.