Европските берзански индекси деновиве се во пораст, а цената на нафтата скокна за околу два отсто поради конфликтот во Црвено Море. Цените на нафтата пораснаа откако Велика Британија и САД извршија воени напади врз цели во областите на Јемен контролирани од бунтовниците Хути, јавува CNBC.
Цените на нафтата, златото и пченицата продолжуваат да растат како и во поголемиот дел од оваа недела.Индексот DAX на Франкфуртската берза денеска во 9 часот порасна на 16.781,00 поени, исто како и францускиот CAC 40 на 7.458,13 поени, додека лондонски FTSE 100 падна на 7.651,76 поени, а московски MOEX на 3.151,00 поени.
Вредноста на американскиот берзански индекс Дау Џонс се искачи на 37.695,73 поени пред денешното отворање на пазарот, како и вредноста на индексот S&P 500 на 4.783,45 поени и вредноста на индексот Nasdaq на 14.969,65 поени.
Според податоците на берзата, цената на суровата нафта се искачи на 71.919 долари, а на нафтата од типот „брент“ на 77.478 долари. На отворањето на берзата ТТФ европските фјучерси на гас се продаваа по цена од 30,6 евра за мегават-час.
Цената на златото порасна на 2.033,17 долари за унца (унца е еднаква на 28,35 грама), а цената на пченицата се искачи на 6,1288 долари за бушел (бушел е 27,216 кг). Вредноста на еврото во однос на доларот изнесуваше 1,09773, што е приближно исто како и вчера.