Пет банки од Македонија се најдоа на листата на топ 100 во југоисточна Европа, покажува анализата на „Seenews“.

Од вкупно 100, Комерцијална банка се најде на 42-то место, исто како и минатата година, со актива од нешто над две милијарди евра. Девет места подолу се најде Стопанска банка АД – Скопје со актива од 1,6 милијарди евра, додека НЛБ Банка се позиционираше на 59-то место со актива од 1,4 милијарди евра. Меѓу петте банки од Македонија, кои се најдоа на листата топ 100, се и: Халкбанк АД Скопје на 77-то место и Охридска банка АД Скопје на 91-та позиција.

На врвот на листата се најде романската „Banca Transilvania” со актива од 18,2 милијарди евра. Меѓу првите пет се најдоа и: „Zagrebacka Banka” од Хрватска (15,8 милијарди евра), „Banca Comerciala Romana” од Романија (14,9 милијарди евра), „Privredna Banka Zagreb” од Хрватска (11,7 милијарди евра) и „BDR – Groupe Societe Generale” од Романија (11,6 милијарди евра).

На дното на листата се најдоа: „Erste Bank” од Црна Гора (актива од 605 милиони евра), „American Bank of Investments” од Албанија (611 милиони евра), „NLB Banka AD” од Србија (616 милиони евра), „Tirana Banka” од Албанија (623 милиони евра) и „Mobiasbanca OTP Group” од Молдавија (633 милиони евра).

Во анализата се земени банки од: Романија, Хрватска, Бугарија, Словенија, Босна и Херцеговина, Србија, Албанија, Северна Македонија, Молдавија, Црна Гора и Косово.