Поставени се фотоволтаици за производство на струја на покривот од Основното општинско училиште „Гоце Делчев“ во Неготино, информираше попладнево директорката на училиштето Елена Стојанова. Вкупната вредност на проектот е  2.573.311.55 денари. Училиштето постои 50 години и овде се школуваат 778 ученици, заедно со подрачните училишта.
– Поставувањето на фотонапонски панели ќе доведе до голема заштеда во буџетот на училиштето, што во голема мера ќе придонесе за реализација на идни проекти за унапредување на воспитно-образовната дејност, појасни Стојанова за МИА.
Таа нагласи дека проектот е со тендеција за користење во зимскиот период, при искористување на сончевата светлина за да се заштеди на нафта.
Изведувач на работите е Алкито експорт импорт дооел Неготино. Стојанова појасни дека за фотоволтаиците имаат 25-годишна гаранција.
Таа најави дека наскоро се очекува фотоволтаици да бидат поставени и во подрачното училиште во селото Долни Дисан, каде што има деветтолетка.