Американскиот автомобилски гигант „Форд Мотор“ планира да укине до 3.200 работни места во Европа и да пресели дел од својот бизнис за развој на производи во матичните САД, објави германскиот синдикат „ИГ Метал“. Компанијата сака да отпушти до 2.500 работници во одделот за развој на производи и до 700 во администрацијата, а повеќето од работниците ќе бидат отпуштени на локации во Германија.
Работниците во фабриката на „Форд“ во Келн, која вработува околу 14.000 луѓе, вклучително и 3.800 во центарот за развој на производи, беа информирани за плановите на состанокот на работниот совет. Портпаролот на „Форд“ во Германија одби да ја коментира изјавата на синдикатот, цитирајќи ја изјавата во петокот во која се вели дека преминот кон производство на електрични возила (EV) бара структурни промени.
Портпаролот во седиштето на Форд во Мичиген рече дека разговорите со германските работнички совети продолжуваат и дека компанијата треба да биде поконкурентна во нејзината транзиција кон производство на електрични возила. Тој не сакаше да коментира конкретни бизнис планови.
Минатата година „Форд“ најави инвестиција од две милијарди долари во проширување на производството во фабриката во Келн, која треба да произведе целосно електричен модел за клиенти со помала куповна моќ. Фабриката моментално произведува „Форд Фиеста“, мотори и менувачи.